في بداية دخول الانترنت بشكل كبيرة لمصر واستعمال كتير منا للإيميل او اي موقع بيطلب تسجيل اتعرضنا لحاجة اسمها (zip code / postal code) أو الرمز / الكود البريدي ومحدش كان عارف هيا اصلا ايه. كله بدأ يجرب ويسجل بأي أرقام والرقم اللي ينفع يحفظه ويديه لاصحابه وبردو محدش عارف هوا ايه؟؟!
ولحد دلوقتي ناس تدخل وتسأل ايه هوا الرمز البريدي لمصر؟ ايه هوا الرمز البريدي للقاهرة؟ طب الجيزة ؟؟ طب............
والاجابات تتفاوت ما بين اللي يدخل ويقولك خد الرقم دا متجرب وشغال واللي يقولك اكتب أي خمس أرقام هيقبل واللي واللي....
طب هو اصلا في رمز بريدي لمصر؟ ويعني ايه اصلا الرمز البريدي؟؟
الـ ZIP Code
النظام دا نظام امريكي بيستخدم هناك من سنة 1963 واختصار الكلمة معناه بالعربي خطة تحسين المنطقة "Zone Improvement Plan" النظام دا بيستخدم الارقام وكل رقم ليه مدلول.
وبدون الدخول في تفاصيل الأرقام دي بتحدد المنطقة بالظبط بعيدا عن اسامي الشوارع والمناطق وأي لخبطة ممكن تحصل.
الـ Postal Code
وهو مشابه للـ zip code.. يعني مثلا مصر فيها أكتر من محافظه والمحافظه فيها كذا مدينه وكل مدينه لها مكاتب بريد، كل مكتب بريد له رمز بريدي مطلوب لارسال التلغرافات اليه او الحوالات او الاخطارات..مكتب البريد هوا اللي بيوزع على العناوين اللي في المنطقة المخصصة ليه وهكذا.
مصادر الحصول على الرمز:
من المصادر اللي ممكن اجيب منها الرمز هي:
1- بعص الشوارع فيها الرمز البريدي للشارع
2- أي جواب من البريد بيبقي مختوم بالرمز البريد
3- ممكن نسأل في مكتب البريد نفسه
4- بعض المواقع زي: كود مصر
أخيرا الرمز البريدي مهم لو هتستلم خطابات او حوالات او أي تعامل مالي فمش لازم يكون دقيق 100%